2014 ல் என் திரை உலகம் ஒரு திறந்தவெளி குறிப்பேடு

வணக்கம் உறவுகளே

இந்த வருடமே என் திரை உலகப்பயணத்தில் முழு மூச்சாகத் தொழிற்பட்ட ஆண்டாகும். வரும் ஆண்டு எப்படி அமையுமோ எனத் தெரியாமையால் ஒரு காலப்பதிவாக நான் மீளத்தட்டிப்பார்க்கும் போது இருக்கட்டுமே என இப்பதிவை பதிந்து வைக்கிறேன்.
யாருமே இந்தளவு படைப்புக்களில் மற்றும் இந்தளவு கலைஞர்களுடன் இணைந்து ஒரு வருடத்தில் பணியாற்றியிருக்க முடியாது என்ற ஒருவித தலைக்கனமற்ற இறுமாப்புடனேயே இப்பதிவை பகிர்கிறேன்.

1. ”சுவர் தேடும் சித்திரம்” காணொளிப்பாடல்.

- இப்பாடல் பிரான்சில் இடம்பெறும் ஒளிக்கீற்று போட்டிக்காக செய்யப்பட்டு அப்போட்டியில் ”நடுவர் தெரிவு விருது” பெற்றதுடன் குழந்தை நட்சத்திரத்துக்காக nominate ஆகியிருந்தது.
- சுடர் விருதில் சிறந்த பாடல் இயக்குனருக்கான விருதையும் சிறந்த பாடலாகவும் தெரிவு செய்யப்பட்டிருந்தது.
- வேல்ஸ் விருது விழாவில் 7 துறைகளுக்கு nominate ஆகியிருந்ததுடன் சிறந்த பாடகருக்கான விருதையும் பெற்றிருந்தது.
”இப்பாடலானது வேறு ஒரு இசையமைப்பாளரின் பாடலுக்காக காணொளி செய்யப்பட்டு போட்டியின் 3 நாட்களுக்கு முன்னர் அவர் தனது பாடலை தன் இயக்கத்தில் அனுப்ப முடிவெடுத்ததால் 3 நாட்களில் உருவாக்கப்பட்ட ஒலிவடிவத்துக்கு மீள் காட்சி எடுக்கப்பட்டு உருவாக்கப்பட்டிருந்தது”

பாடல் தொடுப்பு - https://www.youtube.com/watch?v=5ZZKP0NR0cw&index=1&list=PLvypgJcFnUlM--gTlUoI-wPw0dOxpABVf

2 . ”மிச்சக்காசு” குறும்படம்.

2013 ம் ஆண்டு ரொக்கட் ராஜா, துலைக்கோ போறியள் குறும்படத்துக்கு பிறகு தயாரிப்பாளர் இல்லாமல் ஒதுங்கியிருந்த நேரம் திரைக்கதையை மட்டுமே நம்பி சாம்சுங் கைப்பேசியில் உருவாக்க முடிவெடுத்து உருவாக்கிய 4 நிமிடக் குறும்படம். இக்குறும்படத்தை ஈழத்திரை இணையத்தளம் விலை கொடுத்து அதன் உரிமத்தை வாங்கி வெளியிட்டிருந்தது.
இலங்கைக்கு வந்திருந்த ஜேர்மானிய இயக்குனர் அலெக்சான்டர் ரைடல் இக்குறும்படத்தை தன்னுடைய நாட்டினருக்கு காட்ட என அனுமதி பெற்று பெற்றுச் சென்றிருந்தார்.
ஈழத்துக் குறும்படம் ஒன்றுக்கு இந்தியாவின் பெரிய ஊடகம் ஒன்று விமர்சனம் வழங்கியது இதற்கு தான் முதன் முறை என பல இந்தியரால் பாராட்டப்பட்டிருந்தது. "THE HINDU" இதழில் இடம்பெற்றிருந்தமை குறிப்பிடத்தக்கதாகும்.
எனக்கு பெரிய அடையாளம் ஒன்றைக் கொடுத்த இக்குறும்படம்
- AAA விருது விழாவில் சிறந்த திரைக்கதைக்கான விருதையும்
- சுடர் விருது விழாவிலும்
-இளமை விருது விழாவிலும் சிறந்த குழந்தை நட்சத்திர விருதையும் பெற்றிருந்தது.

படத் தொடுப்பு -  https://www.youtube.com/watch?v=yrMBar0cnM4&list=PLvypgJcFnUlPqFf2Dh0GCsGHB7XE7KDwb&index=2

3. ”தொடரி” குறும்படம்.

10 சோடி கால்களையும் ஒரு சொடி கைகளும் மட்டுமே நடித்திருந்த இந்த 4 நிமிடக் குறும்படத்தையும் கைப்பேசியிலேயே எடுத்து முடித்திருந்தோம்.
சிறந்த ஒலியமைப்புக்காக இப்படம் பலரது பாராட்டைப் பெற்றிருந்தது.

படத் தொடுப்பு - https://www.youtube.com/watch?v=tiRhVCeDkIY&list=PLvypgJcFnUlPqFf2Dh0GCsGHB7XE7KDwb&index=5

4. ”தழும்பு” குறும்படம்.

ஒரு முன்னாள் போராளியின் இந்நாளைய மன வடுவை காட்டும் இக்குறும்படத்தை பிரான்ஸ் நாவலர் விருது விழாவுக்காக எடுத்திருந்தோம். பலத்தை சர்ச்சைகளுக்குள் என்னை சிக்க வைத்த இக்குறும்படத்துக்கு பல முன்னாள் போராளிகளின் நேரடியானதும் தொலைபேசியூடானதுமான பாராட்டு பெரிய அங்கீகாரமாக அமைந்தது.
- நாவலர் விருது விழாவில் இறுதிச் சுற்றுக்கு தெரிவு செய்யப்பட்டிருந்தது.
- ரதி விருது விழாவில் சிறந்த இயக்குனருக்கான விருதை பெற்றுக் கொடுத்திருந்தது.

படத் தொடுப்பு -  https://www.youtube.com/watch?v=yQrBLcRJLOw&list=PLvypgJcFnUlPqFf2Dh0GCsGHB7XE7KDwb&index=4

5. ”கொண்டோடி” குறும்படம்

வன்னியில் இருந்து மீண்டு வந்த பெண்ணொருவர் மீது சமூகம் நோக்கும் தப்பான பார்வையை மையமாக வைத்து உருவாக்கப்பட்ட இக்குறும்படம் ஒரு உண்மைச் சம்பவத்தை முதல் முதல் காட்சிக்கு கொண்டு வந்தமைக்காக பலரால் அங்கீகரிக்கப்பட்டிருந்தது.

படத் தொடுப்பு - https://www.youtube.com/watch?v=9bIaVGeAA98&list=PLvypgJcFnUlPqFf2Dh0GCsGHB7XE7KDwb&index=1

6. ”கரகம்” ஆவணப்படம்

வல்வெட்டித்துறை கம்பர்மலையை சேர்ந்த மிக மூத்த கலைஞரான கந்தையா விசியரத்தினம் அவர்களை வைத்து முழுமையாக உருவாக்கப்பட்ட 28 நிமிடங்களைக் கொண்ட இவ் ஆவணப்படத்தை கரவெட்டி பிரதேசர் செயலகம் தயாரித்திருந்தது.

7. ”சுவர் தேடும் சித்திரம்” குறும்படம்
சில தவிர்க்க முடியாத காரணங்களால் என்னால் உருவாக்கப்பட்ட இக்குறும்படம் கைவிடப்பட்டிருந்தது. ஆனால் அடுத்த வருடம் இக்குறும்படம் வெளியிடப்படும்.

8. தண்ணீர் சம்மந்தமாக நான் உருவாக்கிய ”FINAL DROP" ஒரு நிமிடப்படம் வெளியீட்டுக்காக காத்திருக்கிறது.

இவை தவிர இந்த ஆண்டும் தொடர்ந்து 4 வது வருடமாக ”தாத்தா” குறும்படம் வெளியிட முடியாமல் ஏமாந்து அடுத்த ஆண்டுக்குள் நுழைகிறேன்.

இவை தவிர நண்பர்களின் படங்களாக.

1. ”குறுவட்டு”  குறும்படம்.
அமெரிக்க நிறுவனம் ஒன்றால் நடாத்தப்படும் 48 மணித்தியாலக் குறும்படப் போட்டியில் சகோதரன் லோககாந்தனின் ராஜேஸ்ரோன் நிறுவனத்தில் சார்பில் லோககாந்தனுடன் இணைந்து திரைக்கதை எழுதி இயக்கி படமாகும். அத்துடன் ஒரு பாத்திரத்திலும் நடித்திருந்தேன்.

- இக்குறும்படமானது சிறந்த படத்துக்கான விருதையும் சிறந்த திரைக்கதைக்கான விருதையும் பெற்று அதில் உழைத்த 14 பேருக்கும் பெருமை சேர்த்து அமெரிக்கவரை இறுதிப் போட்டிக்காக சென்றிருக்கிறது.

பட முன்னோட்டம் - https://www.youtube.com/watch?v=Q4V9q1BdO4Q&index=2&list=PLvypgJcFnUlPLbDIUCq22lPJuh_iEp7ru

3. பிறேமின் இயக்கத்தில் ”போலி” குறும்படம்.

இக்குறும்படத்தில் பிச்சைக்காரனாக நடித்தமைக்காக திருவணோர் ரோல்கிஸ் நிறுவனத்தால் சிறந்த நடுவராக பிரதி அமைச்சர் பிரபா கணேசன் மூலம் விழா ஒன்றில் கௌரவிக்கப்பட்டேன்.




படத் தொடுப்பு - https://www.youtube.com/watch?v=IClEKlJTfiI&list=PLvypgJcFnUlO6aTXuOSJRvWE0npP_0K4d&index=1

4. துவாரகனின் இயக்கத்தில் ”பிரபல இயக்குனர்”

ரஜீவனின் கதையான இக்கதையை வைத்து துவாரகனால் இயக்கப்பட்டிருந்த இந்த horror குறும்படம் வெளியீட்டுக்காக காத்திருக்கிறது.







பட முன்னோட்டம் - https://www.youtube.com/watch?v=_oXVfMD1J5Q&index=1&list=PLvypgJcFnUlPLbDIUCq22lPJuh_iEp7ru

5. சன்சிகன் இயக்கத்தில் ”அகமுகி” குறும்படம்.
இன்னும் வெளியிடப்படாத இக்குறும்படத்தில் இரண்டு வெவ்வேறு பாத்திரங்களுக்கு குரல் கொடுத்திருந்தேன்.

பட முன்னோட்டம் - https://www.youtube.com/watch?v=nmqI7-zwxlo&list=PLPwmD5Jm3fOiZPnIALBCuepG55kAvQR3t&index=2

6. என் சிறுகதை ஒன்றை இயக்குனர் N.S ஜனா குறும்படமாக எடுத்திருந்தார்.

7. ஜசிதரன் இயக்கத்தில் ”எண்ணங்கள்”
ஒளிப்பதிவாளர் ஜசிதரன் அண்ணாவால் வட்டக்கச்சி பகுதியில் வைத்து இயக்கப்பட்ட இக்குறும்படத்துக்கான பின்கள வேலைகள் நடந்த வண்ணம் உள்ளது.

8. லோககாந்தன் இயக்கத்தில் நடைபெறும் ”யாழ்தேவி” படப்பிடிப்பு இப்போது இடம்பெற்றுக் கொண்டிருக்கிறது. அத்துடன் அவருடைய இயக்கத்தில் அமைந்த இளவரசர்கள் குறும்படம் பின்கள வேலைகள் நடைபெற்றுக் கொண்டிருக்கிறது.

9. தங்கை ”மதுசாவின்” இயக்கத்தில் நடித்துக் கொண்டிருக்கும் ”நிழல் பொம்மை” குறும்படம் அடுத்த ஆண்டு வெளியிடப்படும்.

மேலே நான் குறிப்பிட்டுள்ள இப்படைப்புக்காக என்னோடு பலர் உழைத்திருக்கிறார்கள். தனித்தனியே நன்றி சொல்ல முடியாமைக்கு மன்னிக்கவும். என் வெற்றிக்கு காரணமாக இருந்த உங்களுக்கு நன்றிக்கடனுடன் என்றும் உங்களுடனேயே பயணிப்பேன்.

நன்றிச் செதுக்கலுடன்
அன்புச் சகோதரன்
மதிசுதா

இந்த ஆண்டு நவராத்திரி விழாவுக்காக நான் இயக்கி நடித்திருந்த நகைச்சுவை நாடகத்திற்கான தொடுப்பு - https://www.youtube.com/watch?v=tLkO6wpi1mE&index=1&list=PLvypgJcFnUlMKufFE9e7yoQOvJ2SgHCBk


இந்த ஆண்டு நான் வழங்கியிருந்த பேட்டிகள் தொடர்பான தொடுப்பு - 
தினக்குரல் - http://www.mathisutha.com/2014/12/mathisiutha-interview.html
ஈழத்திரை -  https://www.youtube.com/watch?v=btMCg4Tsoec&index=2&list=PLvypgJcFnUlNpPva-GaN-NPcUJE8_nb7Z
ரூபவாகினியின் நேத்ரா தொலைக்காட்சி -  https://www.youtube.com/watch?v=HHlCnggZrKw&index=1&list=PLvypgJcFnUlNpPva-GaN-NPcUJE8_nb7Z

1:38 PM - By ம.தி.சுதா 5

வன்னி மீண்ட பெண்களின் களங்கம் கலைக்க நாம் படைத்த ஒரு படைப்பு - “கொண்டோடி குறும்படம்”

வணக்கம் உறவுகளே
சேமம் எப்படி?

 நாம் வெளியிட்டிருந்த புதிய படைப்பு ஒன்றுடன் உங்களைச் சந்திக்கிறேன்.
முழு நீளத் திரைப்படத்துக்கு தயாராகும் நாம் எமது செயற்பாட்டு வேகத்தை அதிகரிப்பதற்காக இக் குறுகிய காலப் படப்பிடிப்பு ஒன்றை கையில் எடுத்துக் கொண்டோம். ”கொண்டோடி” என்று தலைப்பிடப்பட்ட இக் குறும்படத்துக்கான படப்பிடிப்பு மற்றும் பின்கள வேலைகளை 12 மணித்தியாலத்திற்குள் முடித்து வெளியிட்டிருந்தோம்.

இக்குறும்படத்தை RTK friends media தயாரித்திருந்தது. எம் மீது அவர்கள் வைத்த நம்பிக்கையை நாம் கூறியது போல காப்பாற்றியிருந்தது எமக்கு மிகப் பெரிய சந்தோசமான விடயமாகும்.

குறும்படத்துக்கான கதை, திரைக்கதை, இயக்கத்தை நான் பார்த்துக் கொள்ள ஒளிப்பதிவை முதுரனும் சன்சிகனும் செய்தார்கள்.
என்னோடு உதவி இயக்கத்தை ஜனகன் செய்து கொள்ள கதைக்கான உணர்வை

கவிதாயினி, சுஜிதா, சோபி ஆகியோர் செதுக்கி கொடுத்திருந்தார்கள்.

படத்தொகுப்பை மதுரனும் ஒலியமைப்பை சன்சிகனும் மிக வேகமாக செய்து கொடுத்தார்கள்.

எம் பரிட்சார்த்தமாக செய்த இப்படைப்பை தற்போது பகிர்ந்திருந்தாலும் செப்பனிடப்பட்ட படைப்போடு மீண்டும் சந்திக்கலாம்.

தங்களது மேலான கருத்துக்களுக்காக இக்குறும்படம் பகிரப்படுகிறது

நன்றிச் செதுக்கலுடன்
அன்புச் சகோதரன்
மதிசுதா

11:48 AM - By ம.தி.சுதா 0

புத்துணர்ச்சி பெற்றுள்ள கலைஞரின் நாளைய இயக்குனர்

வணக்கம் உறவுகளே
சேமம் எப்படி?

நாளுக்கு நாள் திரைத்துறைக் கனவுகளுடன் பல நூறு இளைஞர்கள் திரைத்துறைக்குள் அடி எடுத்து வைத்துக் கொண்டிருக்கிறார்கள். அப்படியானவர்களுக்கு களம் தர என உருவாக்கப்பட்ட நிகழ்ச்சிகளில் ஒன்று தான் கலைஞர் ரீவியின் நாளைய இயக்குனராகும்.

இந்நிகழ்ச்சியின் ஆரம்பத் தொடர்களில் சாதித்த ஒரு சிலரே இன்று திரை உலகில் நுழைந்திருக்க அதன் பின்னர் சொல்லும்படியாக எவரும் உள் நுழையவில்லை. என் கணிப்பின் படி அவர்களை உருவாக்கியது இந் நிகழ்ச்சியல்ல அவர்களுக்கு ஒரு அடையாளமாக மட்டுமே இந்நிகழ்ச்சி இருந்திருக்கிறது.

அதற்கு காரணம் நடுவர்களின் மனத் தோற்றப்பாட்டையே கூற வேண்டும். மிக நீண்ட வருடங்களாக இந்நிகழ்ச்சியை பார்த்து வரும் எனக்கு இதில் தோன்றிய நடுவர்களது திணிப்புக்கள் என்றைக்குமே உறுத்தலாகவே இருந்திருக்கிறது.

ஒரு குறும்படம் என்பது முழு சினிமாவின் விதிமுறையில் இருந்து முற்றிலும் மாறுபட்டு சட்டதிட்டங்களை களைந்தெறிந்து உருவாக்கப்படுவதே ஆகும் ஆனால் அதற்கு இவர்கள் பல்வெறு விதமான கருத்துக்களைத் திணிப்பார்கள்.

குறிப்பாக அண்மையா நாட்களில் நடுவர்களாக இருந்த சுந்தர்.சி மற்றும் வசந் ஆகியோர் மிக மோசமாகப் படைப்பாளிகள் மேல் ஒரு வரையறைத் திணிப்பை இட்டு வந்தார்கள். கடவுள் செயலாக தனது சுய தேவைக்காக சுந்தர்.சீ ஒதுங்கிக் கொள்ள வேண்டிய நிலை ஏற்பட்டுள்ளது. இதன் காரணமாக கார்த்திக் சுப்புராஜ் நடுவராக உள்வாங்கப்பட்டள்ளார்.

இவரது வருகையின் பின்னரே நடுவர் பக்கத்தில் ஒரு திருப்பு முனை ஏற்பட்டிருக்கிறது என்று கூற வேண்டும். இதுவரை காலமும் நடுவர் ஒருவர் படத்தை பார்த்தாரேன்றால் அவருக்கு அப்படத்தில் இருந்த எது விளங்கியதோ அதனடிப்படையில் தான் அவரது கருத்து மழை கொட்டும்.

ஆனால் கார்த்திக் சுப்ராஜ் வந்ததன் பிற்பாடு ஒரு சின்ன மாற்றம். படைப்பாளியின் கருத்தும் ஒன்று உள்வாங்கப்படும். அவர் படத்தை விளக்கச் சொல்லி ஒரு சொல் கேட்பார். இதில் படைப்பாளிக்கு நல்லதொரு வாய்ப்புக்கிடைக்கிறது.

அதுமட்டுமல்லாமல் இப்படியானதொரு பெரிய போட்டிக்கு சிறந்த கதை ஒன்றைத் தான் எடுப்பார்கள். ஆனால் பார்க்கும் எமக்கு அது சொதப்பலாகத் தெரியும். அப்படியானால் எங்கோ ஓரு இடத்தில் தப்பு நடந்திருக்கும். இவரது இச்செயற்பாட்டால் இலகுவாக அதை அடையாளம் காணக் கூடியதாக இருக்கின்றது. இது படைப்பாளிகளுக்கும் பார்வையாளர்களுக்கும் மிகவும் பயனைக் கொடுக்கிறது.

அரையிறுதிச் சுற்று நடந்து கொண்டிருக்கும் இவ்வேளையில் அடுத்த தொடருக்கும் கார்த்திக் சுப்புராஜ் இருப்பாராக இருந்தால் இன்னும் சிறப்பாக இருக்கும் என்பது எனது எண்ணமாகும். ஆனால் அவரிடமும் ஒரு குறை இருக்கின்றது. அதாவது ஒன்றில் தனி ஆங்கிலத்தில் பேசலாம் அல்லது தனி தமிழில் பேசலாம் இரண்டையும் கலந்து கோர்த்து கதைப்பாதால் அவர் பேச்சை விளங்கிக் கொள்வது மிகவும் சிரமமானதாக இருக்கிறது.

எப்படியென்றாலும் கடந்த ஒரு சிலவாரங்களாக போட்டியை மிகவும் ரசிக்கக் கூடிய மாதிரி இருக்கின்றது.

நன்றிச் செதுக்கலுடன்
அன்புச் சகோதரன்
ம.தி.சுதா

6:49 PM - By ம.தி.சுதா 3

ஈழத்தவர் புலம்பெயர் வாழ்வியல் காட்டும் ”இருளின் நிழல்”

வணக்கம் உறவுகளே
சேமம் எப்படி?

எம் சினிமா வளரவில்லை வளரவில்லை என்று கூறிக் கொண்டு குண்டுச் சட்டிக்குள் பிட்டத்தை ஓட்டி விட்டு எழும்பத் தெரியாமல் இருக்கும் பலருக்கு அடிக்கடி எம் சில சினிமாக்களை வலிந்து திணித்துக் காட்ட வேண்டியிருக்கிறது.

2013 ல் உருவாக்கப்பட்ட கடந்த வாரம் பிரான்சில் இருந்து வெளியிடப்பட்டிருந்த பிரசண்ணாவின் ”இருளின் நிழல்” குறும்படத்தை பற்றி கட்டாயம் பேசியே ஆக வேண்டும். முதலில் அவரது படத் தலைப்புத் தெரிவுக்கு என் முதல் வாழ்த்துக்கள்.
காரணம் எப்போதும் படத் தலைப்பு என்பது படத்தின் பிரதிபலிப்பாகவும் ஒரு இயக்குனரின் அடையாளமாகவும் காணப்படும். ஆழமான அந்த அர்த்தத்தை பொதிந்திருந்த தலைப்பே படத்துக்கான ஒரு ஆர்வத்தை அள்ளி விதைத்திருந்தது.

சுய பூமியில் வாழ்வியலைத் தொலைத்து விட்டு புலத்தில் போயிருந்து வாழக்கைப் போராட்டம் நடத்தும் பல இளைஞர்களின் பிரதிபலிப்பாக படம் அமைந்திருந்தது. அந்த இளைஞனாக வந்த ரஜிந் இன் பாத்திரம் இப்பவும் மனசில் அப்படியே ஒட்டி நிற்கிறது.

ஒவ்வொரு பாத்திரத் தெரிவுகளிலும் சரியாகக் கவனம் செலுத்தப்பட்டிருக்கிறது. படத்தை தூக்கி வைத்திருக்கும் இரண்டு முக்கிய கதாபாத்திரங்களும் மிக மிகச் சரியான தெரிவாக அமைந்திருந்தது. அதிலும் குணபாலன் அண்ணாவின் நடிப்பு பற்றி சொல்லவே தேவையில்லை படம் பார்த்தால் நீங்களே சொல்லுவீர்கள்.
வசனங்கள் சில இடத்தில் பேச்சுத் தமிழில் இருந்து விலத்தியிருந்தாலும் மிக அழுத்தமான வசனங்களாகும்.
“ மக்களுக்காக திறந்திருந்த கடைகள் மட்டும் கடைப்பிடிச்சவையே”
”விசா கிடைச்சோண்ணை என்னைப்பாரு என்ரை குண்டியை பாரு எண்டு திரிவியள்”

இயக்குனர் திரைக்கதை அமைத்த விதமும் சகலருக்கும் சொல்ல வந்த விடயத்தை தெளிவாகக் காட்டியிருக்கிறது. காரணம் எந்த ஒரு இடத்தில் கூட குணபாலன் அண்ணாவின் மறைத் தோற்றம் அவர் பாவனையில் (காட்சியில் இருந்தல்ல) இருந்து வெளிப்படுத்தப்படவில்லை. அதனால் பிரசண்ணாவே தோன்றும் இறுதிக் காட்சியில் அந்த முடிச்சை முற்று முழுதாக பார்வையாளருக்கு அவிட்டுக் காட்டுகிறார்.
இக்குறும்படமானது 

london internaional tamil film festivel 2014 ல் 3 ம் இடத்தையும் சிறந்த writter க்கான விருதையும்

navalar short film festivel 2013 ல் 3 ம் இடத்தையும்

norway tamil film festivel ல் official selection ஆகவும் தெரிவு செய்யப்பட்டிருந்தது.

இக்குறும்படத்தை படைத்த அவதாரம் மற்றும் அதற்காக உழைத்த குழு அனைவருக்கும் நல்ல ஈழப்படம் ஒன்றைத் தந்ததற்காக என்னுடைய நன்றிகள்.

நன்றிச் செதுக்கலுடன்
அன்புச் சகோதரன்
ம.தி.சுதா

10:51 AM - By ம.தி.சுதா 3

சமூகத்துக்காக உருவாக்கப்பட்ட 3 குறும்படங்கள்

வணக்கம் உறவுகளே
சேமம் எப்படி?

முற்குறிப்பு - கடந்த மாதத்திற்குள் ஈழத்தவரால் வெளியிடப்பட்ட 3 சமூக விழிப்புணர்வுக் குறும்படங்களை பகிர்கின்றேன். இது என் விமர்சனப்பதிவல்ல என் ரசனைப் பதிவேயாகும். இம் மூன்று படைப்பிலும் சொல்லப்பட்ட கருத்துக்கள் சமூகத்துக்கு முக்கியமானவையாகும்.

1 . மாசிலான் குறும்படம்
குடும்பநலனை அக்கறையாகவும் அதற்குள் வதைபட்டுப் போகும் பிஞ்சுகளின் மனநிலையையும் அத்தனை பிச்சுப் பிடுங்கல் குடும்பகாரருக்கும் உறைக்க வைத்த குறும்படமாக ரப் பாடகரும் இயக்குனரும் நடிகருமான சுஜித்.ஜீ  அண்ணாவால் உருவாக்கப்பட்ட படைப்பாகும். மற்றவையும் சிறப்பாக அமைக்கப்பட்டிருந்தாலும் இக்குறுப்படத்தில் ஒவ்வொரு காட்சிக்குமான தொடர்ச்சி என்பது என்னை மிகவும் கவர்ந்தது.

2. அஞ்சல குறும்படம்
இசையமைப்பாளர் தர்சனனின் இயக்கத்தில் வெளிவந்த இரண்டாவது குறும்படமான அஞ்சல முன்னையதை விட மிகுந்த நிகழ்கால சமூக அக்கறையுடன் பிரசவிக்கப்பட்டிருப்பதுடன் இன்யை இளைய தலைமுறைக்கு ஒரு வித அச்சத்தையும் கொடுத்திருந்தது.

3.  கடந்து போகும் குறும்படம்
ஒளிப்பதிவாளர், படத்தொகுப்பாளர், இயக்குனருமான லோககாந்தனால் உருவாக்கப்பட்ட கடந்து பொகும் என்ற குறும்படம் கடந்த வாரம் வெளியாகியிருந்தது. நிகழ்காலத்தில் இடம்பெறும் தற்கொலைகளை மையப்படுத்தி தற்கொலைக்கு துணியும் ஒவ்வாரு மனிதனையும் ஒரு கணம் சிந்திக்க வைக்கிறது இக் குறும்படம்.

மேற் குறிப்பிட்ட குறும்படங்களை பார்வையிட்டு அவர்களுக்கான ஆக்க பூர்வமான கருத்துக்களை வழங்கவும்.

நன்றிச் செதுக்கலுடன்
அன்புச் சகோதரன்
ம.தி.சுதா

12:27 PM - By ம.தி.சுதா 3

முன்னாள் போராளிகளுக்காக எமது புதிய குறும்படம்

வணக்கம் உறவுகளே சேமம் எப்படி?

எமது ஆய்வம் குழுமத்தின் மூன்றவது படைப்பாகவும் என்னுடைய இயக்கத்தில் வெளியாகும் ஐந்தாவது குறும்படமாகவும் (மிச்சக்காசு, தொடரி துலைக்கோ போறியள்  , ரொக்கட் ராஜா  ஐ தொடர்ந்து) வெளியாகிறது ”தழும்பு” குறும்படம்.
இக்குறும்படம் ஒரு முன்னாள் போராளியின் இந்நாள் வாழ்க்கைப் போராட்டத்தை சித்தரித்துள்ளது.. பல விடயங்களை வசனமாகவோ கதையாகவோ உட்புகுத்த முடியாமையால் காட்சிகளாகவே புகுத்தியுள்ளோம்.
நானே இக் குறும்படத்துக்கான திரைக்கதையை அமைத்து இயக்கி நடித்துள்ளேன். நெற்கொழுதாசனுடைய சிறுகதை ஒன்றின் மூலத்தை அடிப்படையாக வைத்து இந்த திரைக்கதையை குறும்படத்துக்கு ஏற்றாற் போல மாற்றப்பட்டிருந்தது.
படத்துக்கான ஒளிப்பதிவை பாலமுரளியும், படத்தொகுப்பை மதுரனும், இசையை தர்சனனும் வழங்கியிருக்கிறார்கள்.
படத்துக்கான ஒலியமைப்பை சன்சிகள் மேற்கொள்ள சீனா உதயகுமார், தினேஸ் ஏகாம்பரம், லக்ஸ்மன், குமணன், தீபன் ஆகியோர் நடித்துள்ளார்கள்.
குறும்படத்துக்கான முக்கிய உதவிகளை மாதவனும், துவாரகனும் வழங்கியிருக்கிறார்கள்.

இதே குழு தான் அடுத்த கட்டமாக ”உம்மாண்டி” என்ற முழு நீளத் திரைப்படத்துக்கான நகர்வுகளிகன் முக்கிய கட்டங்களை கடந்துள்ளது. முற்று முழுதாக ஈழத்தை மையப்படுத்தியதும் ஆனால் முற் போக்குத்தனமான ஈழத்தில் இதுவரை யாரும் தொடாத ஒரு பக்கத்தை தொடக் கூடியதுமான திரைக்கதையுடன் களம் இறங்கும் இக் குழுவுக்கு உதவ விரும்புபவர்கள் உதவலாம்.

கனடாவில் ஸ்டார் 67 என்ற வெற்றிப் படம் ஒன்றைக் கொடுத்த இயக்குனர் கதி செல்வக்குமாரின் இணைத் தயாரிப்புடன் பயணத்தை ஆரம்பித்திருக்கும் இக்குழுவிற்கு படைப்பை பூரணப்படுத்தவதற்கு தங்களால் இயன்ற சிறு தொகையையாவது கடனாக பகிரலாம். நிச்சயம் அத்தொகை தாங்கள் குறிப்பிடும் சட்ட ஒழுங்குகளுடன் பெறப்பட்டு திருப்பியளிக்கப்படும் என்பதை இயக்குனராக  உறுதிப்படுத்துகிறார்.

தொடர்பிற்கு -
mathisutha56@gmail.com
0094773481379

நன்றிச் செதுக்கலுடன்
அன்புச் சகோதரன்
ம.தி.சுதா

10:09 PM - By ம.தி.சுதா 4

இலங்கை குறும்படத்துறையில் மொபைல் புரட்சியோடு எம் படைப்பு

வணக்கம் உறவுகளே
சேமம் எப்படி?
முற்குறிப்பு - இது ஒரு சுயபுராண ஆக்கமாகும்.

கடந்த சில நாட்களுக்கு முன்னர் “மிச்சக்காசு“ என்ற குறும்படத்தை வெளியிட்டிருந்தோம் இக்குறும்படம் sumsung s3 மொபைலில் படமாக்கப்பட்டு sumsung galaxy tab ல் இசை அமைக்கப்பட்டும் இருந்தது.
இப்படைப்பில் மதுரன், துவா, மதீசன், சங்கர், சுதேசினி, சுஜிதா போன்றோர் உழைத்திருந்தார்கள்.
பல்வேறு பட்ட நாடுகளில் இருந்தும் பல்வேறுபட்ட துறைசார்ந்தவர்களிடம் இருந்தும் இப்படைப்புக்கு பாராட்டுக் கிடைத்தது ஒரு எதிர் பார்க்காத வெற்றி ஒன்றாகும்.
அதிலும் தென்னிந்திய இயக்குனர் ஒருவரின் பாராட்டுக்கிடைத்தது மிகப் பெரும் சந்தோசமாக இருந்தது.
குறிப்பாக உள் நாட்டிலேயே ஒரு சில ஊடகங்கள் தவிர மற்றைய எதுவும் கவனிக்கத் தவறிய படைப்பு ஒன்றை இந்திய ஊடகங்கள் கவனத்தில் எடுத்தது வியப்பை அளித்தது.
உ+ம் - சில நட்களுக்கு முன்னர் THE HINDU பத்திரிகையில் விமர்சனம் ஒன்று வெளியாகியிருந்தது.

அத்துடன் சிறந்த திரைக்கதைக்கான விருது ஒன்றையும் இக்குறும்படம் பெற்றுக் கொடுத்திருந்தது.

அதை விட எமக்கு பெருமை அளித்த விடயங்களில் ஒன்று MRTC ன் ஆவணப்பட செயலமர்விற்கு வந்திரந்த ஜேர்மனிய இயக்குனர் அலெக்சாண்டர் ரைடல் இப்படைப்பைப் பார்த்து வியந்து அளித்த கருத்துக்கள் தான். இப்படைப்பின் தரத்தை தனது நண்பர்களுக்கு காட்ட என அப்படைப்பை தன்னொடு எடுத்துச் சென்றதும் மிக முக்கிய சம்பவமாகும்.
அவர் கருத்தக்கள் இவ் ஒலித் தொடுப்பில் இருக்கிறது

 
இக்குறும்படத்துக்கு வெளிப்படையான கருத்துக்களைத் தந்ததோடில்லாமல் பகிர்ந்து எமக்கு ஆக்கமும் ஊக்கமும் தந்த அனைத்து உறவுகளுக்கும் நன்றிகள்.

மிச்சக்காசு குறும்படத்தைக் காண

இப்படைப்பை வழங்கிய அதே குழுவினர் “ஆய்வம்“ என்ற பெயருடன் இன்று இரவு 7 மணிக்கு “தொடரி“ என்றதொரு வித்தியாசமான படைப்புடன் உங்களை சந்திக்கிறார்கள். இக்குறும்படத்தில் 10 சோடி கால்களும் ஒரு சொடி கைகளும் மட்டுமே நடித்திருந்தமை குறிப்பிடத் தக்க விடயமாகும்.

நன்றிச் செதுக்கலுடன்
அன்புச் சகோதரன்
ம.தி.சுதா

1:33 PM - By ம.தி.சுதா 13

என் 200 வது பதிவும் குறும்பட விபரங்களும் (THULAIKKO PORIYAL TRAILER)

வணக்கம் உறவுகளே

சேமம் எப்படி?

முற்குறிப்பு- இக்குறும்படமானது எனக்குள் இருந்த குறும்படக் கனவுக்கு தீனி போடுவதற்காக உருவாக்கப்படுவதே தவிர இது எனது தொழில் முறை ரீதியான முயற்சியல்ல என்பதை கூற விரும்புகின்றேன். இதற்குப் பிறகும் எனது படைப்புக்கள் வருமா என்பது என் தொழில் தான் தீர்மானிக்கும்.

எப்போதுமே முதல் முயற்சிகள எல்லோருக்கும் வெற்றியளிப்பதில்லை ஆனால் அம் முயற்சி மீதிருக்கும் தீவிரம் அதை கைவிடாமல் வைத்திருந்தால் என்றோ ஒரு நாள் ஆரம்பத்தில் இருந்த அதே உற்சாகத்துடன் அவ் இலக்கை அடைய உதவும் அந்த வகையில் எனக்குள் இருந்த ஆர்வத்திற்கு எனது மைத்துனர் ரஜிகரன் கொடுத்த உதவி தான் இப்படைப்பு.

படைப்பு பற்றிய ஒரு சிறு விபரம்

ஒரு சமூகத்தில் வாழும் ஒவ்வொருவருக்குள்ளும் சில விடயங்கள் நெருடிக் கொண்டிருக்கும் சிலர் அதை வெளிக்காட்டிக் கொள்வார்கள் பலர் தமக்குள் அமுக்கி வைத்துக் கொள்வார்கள் அந்தவகையில் வழமையாக எழுத்துக்களால் விதைத்துக் கொள்ளும் நான் இம்முறை சில காட்சிகளால் நகைச்சுவையுடன் விபரித்துள்ளது தான் “துலைக்கோ போறியள்“ என்ற இக்குறும்படமாகும்.
இத்தலைப்பானது எமது பிரதேசங்களில் மிகவும் அருகிப் போய்க் கொண்டிருக்கும் ஒரு பேச்சு மொழியாகும். ஒருவர் போய்க் கொண்டிருக்கும் போது “எங்கே போகிறீர்கள்“ என்பது ஒரு அபசகுணமாககக் கருதப்படுவதால் இப்படி அழைத்து வினாவுவார்கள். 

உடுப்பிட்டி நாவலடி, நெல்லியடி, நவிண்டில், வதிரி போன்ற 5 களங்களில் உருவாக்கப்பட்ட 8 காட்சிகளுடன் இக்குறும்படம் உருவாக்கம் பெற்றுள்ளது.

படம் தொடர்பான பணிகள் முடிவடைந்துள்ள போதும் வரும் மாதம் அளவில் தான் வெளியிட உத்தேசிக்கப்பட்டுள்ளது.

இதற்கு மனம் சற்றும் கூட சலிக்காமல் கமராவுடன் ஒத்துழைத்த செல்லா அண்ணா கணணியுடன் போராடிய செல்வம் அண்ணா நேர காலம் பாராமல் ஓடி வந்து ஒத்துழைத்த ஜெயதீபன், செல்வம் அண்ணா, ஏரம்பு ஐயா, ஆசிரியை சுதேசினி போன்றோர் என்றும் என் நன்றிக்குரியவர்கள்.

என்ன படைப்பு எப்படியானது என்று கூட அறியாமல் ”மதிசுதாவா செய்தவன் அப்படியென்றால் சரி” என்று சம்மதம் சொல்லி இசையமைத்து தந்த அற்புதன் அண்ணா.

பலவகையான தொடர்புகளுக்கு உதவிய வேல் முருகன்.

அதுமட்டுமல்லாமல் நேர காலம் பாராமல் என்ன வடிவத்தில் கேட்டாலும் மாற்றி மாற்றி வடிவமைத்துத் தந்த பதிவர் மதுரன் மற்றும் ஆலோசனைகள் தந்த அண்ணர் மௌனரூபன் ஆகியோருடன் சகல விதத்திலும் ஒத்துழைப்புத் தந்த செல்லா வீடியோ அலுவலகப் பணியாளர்கள் அனைவருக்கும் ஆரம்பத்திலேயே நன்றிகளை தெரிவித்துக் கொள்கிறேன்.

என் 200 வது பதிவு பற்றியது

வன்னியில் இருந்து மீளும் போதே (நலன்புரி முகாமில் இருக்கும் போது) வலைத்தளம் ஒன்று அமைத்து எழுத வேண்டும் என்ற ஒரு லட்சியத்தோடு பொழுது போக்காக எழுத ஆரம்பித்த இத்தளத்தில் நான் பெற்ற வெகுமதிகள் நான் எதிர் பார்க்காதவையே. அதன் பின்னர் அடைந்த வேலைப்பழுக்கள் எனது பதிவிடுதலுக்கான நேரத்தைப் பிடுங்கிக் கொண்டாலும் 3 வருடத்தில் 200 வது பதிவைத் தொடுகிறேன்.

ஆனால் இத்தனைக்குள்ளும் 467,000 என்ற பார்வைகளின் எண்ணிக்கையானது ஒரு பதிவுக்கான சரசரி பார்வைகள் 2300 என்பதைக் கொடுத்துள்ளது அந்த வகையில் எனக்கு கிடைத்த அங்கீகாரமாகவே இதை எண்ணிக் கொள்கிறேன்.

ஆரம்ப காலத்தில் இருந்து என் பதிவுலக வளர்ச்சிக்கு உதவியவர்களில் ஒருவரான ஜனா அண்ணா தனது பதிவில் குறிப்பிட்டவை இந்த தொடுப்பில் உள்ளது.

இந்தவாரப் பதிவர் - திரு -மதி.சுதா

 நன்றிச் செதுக்கலுடன் 

அன்புச் சகோதரன் 

ம.தி.சுதா

1:56 PM - By ம.தி.சுதா 18

2013 ல் தெரிவான குறும்படங்களின் மேலான ஒரு பார்வை

கடந்த 15.6.2013 அன்று வீரகேசரியில் வெளியாகிய எனது ஆக்கம்.....

வடமாகாண பண்பாட்டலுவல்கள் அமைச்சின் குறும்படப் போட்டி 2013 ல் தெரிவான குறும்படங்களின் மேலான ஒரு பார்வை

தொழில் நுட்பம் என்பது இலகுவாக்கப்பட்டு ஒவ்வொரு தனிமனிதன் கைகளுக்குள்ளும் புகுந்து கொண்டதன் பலனை திரைப்படங்கள் மேல் அதீத ஆர்வம் கொண்ட ஒவ்வொரு ரசிகனையும் உசுப்பேற்றி குறும்படம் என்னும் ஒரு திரைப்புரட்சியை ஏற்படுத்தியுள்ளது.

அதற்கு ஏதுவாக அத்துறையை ஊக்குவிக்கும் முகமாக பல்வேறு போட்டி நிகழ்ச்சிகள் இடம்பெறுகின்றன. அந்த வகையில் கடந்த 31.5.2013 அன்று யாழ்ப்பாணத்தில் வடமாகாண பண்பாட்டலுவல்கள் அமைச்சால் வடமாகாணத்திற்குற்பட்டவர்களுக்கான குறும்படப் போட்டி சிறப்பாக நடைபெற்று முடிந்தது.

முதற்கட்டத் தெரிவுப் போட்கள் வவுனியாவில் இடம்பெற்று அதில் தெரிவு செய்யப்பட்ட 15 குறும்படங்கள் யாழ்ப்பாணம் கல்வித் திணைக்களத்தில் நடுவர்கள் முன்னிலையில் ஒளிபரப்பப்பட்டது.

அப்படங்கள் தொடர்பான ஒரு சுருக்கப் பார்வை இதோ….

1. பாடங்கள்

வாழ்க்கையில் தலை முறை கடக்கவேண்டிய சில பாடங்களை படங்களாகக் கொண்டிருந்த ஒரு குறும்படமாக இருந்தாலும் ஆவணப்படம் ஒன்றின் சாயலை பிரதிபலித்ததால் மற்ற குறும்படங்களில் இருந்து சற்று வேறுபட்டதாகத் தோற்றமளித்தது.

2. சலனங்கள்

முச்சக்கர வண்டி ஓட்டுனர்கள் மீது மற்றவர் வைத்திருக்கும் பார்வை நிலையைத் திசை திருப்ப வைக்கும் கதைச் சுருக்கத்தைக் கொண்டு அமைந்திருந்தது. அத்தனை காட்சிகளும் இரவில் படமாக்கப்பட்டது இயக்குனரின் தற் துணிவைக் காட்டியிருந்தாலும் பல இடங்களில் பாத்திரங்களது முகபாவனை இருளால் மறைக்கப்படடிருந்தது.

3. அப்பு

வன்னியின் முழங்காவிலில் இருந்து தேர்வாகியிருந்த இக்குறும்படமானது ஈழத்தின் முக்கிய கலைகளில் ஒன்றான தெருக்கூத்து கலைஞர் ஒருவரால் உருவாக்கப்பட்டிருந்தது. இக்குறும்படமானது முதுமையின் இடர்பாடுகளைக் கொண்ட கதைக்கருவையும் கை தேர்ந்த பாத்திரத்தையும் கொண்டு உருவாக்கப்பட்டிருந்தாலும் பிறழ்வடையாத நாடகச் சாயலானது குறும்படம் என்ற எல்லைக்குள் உள் இழுக்கத் தவறி விட்டது.

4. தண்ணீர்

5 ரூபாய் தபால் முத்திரையில் எழுதிவிடக் கூடிய ஒரு அழுத்தமான கதையை மட்டும் கொண்டு காட்சிகளையும், யதார்த்தமான பாத்திரம் மற்றும் உணர்வைப் பிரதிபலிக்கும் இசை இவை மட்டும் கொண்டு தத்ரூபமாக வார்த்தெடுக்கப்பட்ட படமாகும்.

5. வேகம்

இளமையின் வேகம் எந்தளவு பாரிய விபத்துக்களை ஏற்படுத்தும் என்பதை உணர வைக்கும் குறும்படமாகும். இதில் கதை மற்றும் பாத்திரங்களின் வேகத்தை விட ஒளிப்பதிவாளரின் வேகம் தான் அதிகம் ரசிக்க வைத்தது.

6. வல்லூறு

போதை தரும் உறவுப் பிரிகையும் சிறுவர்களிடையேயான உணர்வுர்ச் சேர்கையையும் தத்ரூபமாக கூறிய படம். இக்குறும்படத்தின் வெற்றிக்கு இயற்கைச் சூழலும் அத்துடன் ஒளிப்பதிவில் இணைத்துக் கொள்ளப்பட்ட இயற்கை ஒலிகளும் சாதகமாக அமைந்திருந்தாலும் திரைக்கதையின் வேகம் சற்று ரசனையையும் தாமதப்படுத்தியிருந்தது.

7. தோள் கொடு

நியமாகவே வாழ்க்கையில் முன்னேறத் துடிக்கும் ஒரு மாற்றுத் திறணாளியைக் கொண்டு அவன் மனநிலையையும் மனித நேயத்தையும் பொறுப்பற்ற மனிதருக்கு உணர்த்தும்படமாகும். சாதாரண கமரா மற்றும் ஒளித்தொகுப்பு தொழில்நுட்பத்துடன் உருவான நல்ல படங்களில் ஒன்றாகும்.

8. சாம்பல்

நாம் பயன்படுத்தும் பெறுமதி குறைந்த ஒரு அற்ப பொருளுக்குப் பின்னும் எத்தனை ஏழைகளின் உதிரம் ஒளிந்திருக்கிறது என்பதைக் கூறியுள்ள படம் சாம்பலாகும். சிறந்த ஒளிப்பதிவோடும் இசையோடும் மட்டும் பயணித்திருக்கும் இப்படத்திற்கு வசனங்களும் இணைந்திருந்தால் உணர்வுகள் மேலோங்கியிருக்கும்.

9. மரண அறிவித்தல்

பிள்ளைகளின் எதிர்காலத்தை ஒளிமயமாக்க எண்ணி புலம்பெயர் தேசமனுப்பும் பெற்றோரின் வாழ்வு எவ்வளவு இருள்மயமானது என்பதற்கு நல்ல உதாரணமாக அமைந்த படமாகும். நிறப்பிரிகையோ காட்சி மாற்றமோ சரியாக அமையாத flash back காட்சிகள் இப்படம் தொடர்பான சிறு குழப்பத்தை ஏற்றுடுத்தியது.

10. விட்டில்கள்

இணையத் தொழில்நுட்ப வளர்ச்சி இளைய தலைமுறையின் வாழ்வை எப்படி சீரழிக்கிறது என்பதை மட்டக்களப்பு கொலைச்சம்பவத்தை அடிப்படையாக வைத்துக் கூறும் படமாகும். சிறந்த படத் தொகுப்பும் ஒளி நிறக்கலவையும் படத்தின் தரத்தை மற்றைய படங்களில் இருந்து வேறுபடுத்திக் காட்டியதுடன் பின்னணி குரல் முயற்சியிலும் மற்றைய படங்களில் இருந்து பெரிதும் வேறுபட்டிருந்தது. கதையின் கனதியற்ற தன்மையும் நாயகியின் நடிப்போடு ஒட்டாத தன்மையும் படத்திற்கு மறையாக அமைந்திருந்தது.

11. நோ

பல குடும்பங்களின் நான்கு சுவர்களுக்குள் அடங்கிப் போகும் பெண்களின் வேதனையை கமராவுக்குள் கொண்டு வந்த குறும்படமாகும். ஆனால் அளவுக்கதிகமான வன்முறை சார்ந்த ஒரே காட்சிகள் மீள மீள வந்து போனது உறுத்தலாகிப் போனது.

12. எழுத்துப்பிழை

ஒரு விலைமாதுவுக்கும் அவள் குழந்தைக்குமிடையேயான பாசப் பிணைப்பையும் உணர்வுகளையும் உணர்வு பூர்வாமாகக் கூறிய குறும்படமாகும். கதையில் வந்து போன அத்தனை பாத்திரங்களும் கதையோடு ஒன்றித்துப் போனது படத்தின் சிறப்பை மென்மேலும் அதிகரித்திருந்தது.

13. பாதினியம்

இன்றைய சூழலில் சமூகத்தில் இடம்பெறும் இளைஞர் தொடர்பான பிரச்சனைகளை கருவாகக் கொண்டு உருவாக்கப்பட்ட குறும்படமாகும். ஆனால் படத்தில் கவனிக்கத் தவறிய எழுத்துப்பிழைகளும் முன்னுக்குப் பின் முரணான திரைக்கதையும் படத்தின் கனதியைக் குறைத்திருந்தது.

14. ஏ கோல் (a call)

இக்குறும்படப் போட்டியில் ஒரு முற்போக்கான திரைக்கதையுடன் களமிறங்கிய ஒரே ஒரு படம் இது தான். 12பி திரைப்படத்தின் அடிப்படைக் கதை அமைப்பைக் கருவாகக் கொண்டு உருவான வித்தியாசமான படமாகும். ஆனால் மொழி ஆளுகை இழந்த தலைப்பு உறுத்தலாக இருந்ததுடன் இறுதிக் காட்சி ஏதோ ஒரு ஹெலிவுட் படத்தை நினைவுபடுத்துவது போல அமைந்திருந்தது.

15. விழித்திடு

இன்றைய சமூகத்தில் பெண்கள் எப்படி வாழ வேண்டும் என்பதைக் கூறியுள்ள ஒரு படமாக அமைந்திருந்தது. ஆனால் எதற்கெதிராக ஒரு படைப்பு உருவாக்கப்படுகிறதோ அதையே அளவுக்கதிகமாகக் காட்டக் கூடாது கோட்பாட்டை கவனிக்கத் தவறியது படத்தின் மீதான பார்வையை வேறு திசைகளுக்கு மாற்றியிருந்தது.

சிறப்பாக திரையிடப்பட்டிருந்த குறும்படங்களானது ஈழத்தின் குறும்பட வளர்ச்சியை தெளிவாகப் புடம் போட்டுக் காட்டியிருந்தது. சில படங்கள் குறும்படங்கள் என்ற வரையறைக்குள் உள்ளடக்கப்படாதவை என்ற ஒரு விமர்சன நோக்கெழுந்தாலும் இவை ஆரம்ப கட்ட வளர்ச்சிப்பாதை என்பதால் அடுத்தடுத்த காலப்பகுதிகளில் பெரும் மாற்றத்துடனான குறும்பட வளர்ச்சிப் போக்கு உருவாகும் என்பது அனைவரதும் திடமான நம்பிக்கையாகும்.

நன்றிச் செதுக்கலுடன்

அன்புச் சகோதரன்

உடுப்பிட்டியூர்

ம.தி.சுதா

10:22 AM - By ம.தி.சுதா 3

எனக்கு இன்னுமொரு சந்தர்ப்பம் தந்த யாழ்ப்பாண வெளியீடான ”விட்டில்கள்” குறும்படம்

வணக்கம் உறவுகளே
சேமம் எப்படி?

வாழ்க்கையில் சில சந்தர்ப்பங்கள் விபத்துக்கள் போலவே அமைந்து விடுகிறது. எமக்கான சந்தர்ப்ப சூழ்நிலைகள் அமையாவிடினும் சில விடயங்களில் எமக்கிருக்கும் ஆர்வம் என்றும் குன்றாமல் இருக்கும்.

அந்த வகையில் எனக்குத் தொற்றிக் கொண்ட ஆர்வத்தில் ஒன்று தான் இந்த குறும்படப் பைத்தியம் ஆனால் எவையும் ஒரு குறிப்பிட்ட வயதுக்குள் செய்ய வேண்டியவையே... அந்தக் காலம் கடந்தால் மிகவும் சிரமமானதே..

வீடியோ தொகுப்பாளரான நண்பன் வேல் முருகனிடம் எப்போதோ காணும் போது சொல்லியிருந்தேன். ”எங்காவது படப்பிடிப்பு நடந்தால் சொல்லுங்கள் நேரம் கிடைத்தால் பார்க்க வருகிறேன் என்று“ நான் அதை மறந்தாலும் அவர் மறக்க வில்லை.
சில நாட்களின் முன்னர் நவிண்டிலில் ஒரு படம் செய்யுறம் நேரம் கிடைத்தால் வந்திட்டுப் போங்கோ என்றார் சரி பிற்பகல் தானே போவோம் என போனால் நடந்த இடம் எனக்கு நினைவு தெரிவதற்கு முன்னமே எம் குடும்ப நண்பராக இரந்த செல்லாஅண்ணாவின் ஸ்ருடியோ அங்கே பார்த்தால் என்னுடன் முன்பள்ளியிலிருந்து ஒன்றாகப் படித்த பிரதீப் அவனுடன் ஏற்கனவே பழகிய நண்பனான தர்சன் என ஒரு பட்டாளம் நிற்க படத்தின் இயக்குனர் யாரெனப் பார்த்தால் அவரும் பழைய நண்பராகவே இருந்தார்.

செல்லா அண்ணா, தர்சன், பிரதீப், நான்

அப்புறம் என்ன மச்சான் நீயும் ஒரு சீனில் நடிக்கிறாய் என்றால் எனக்கு எந்த ஆயத்தமும் இல்லை. சரி என்ன தெரியாத ஒன்றா செய்திட்டுப் போவோமென இறங்கியது தான் இந்த விட்டில்கள் குறும்படம்.
அடுத்து காட்சிகள் முடிந்து டப்பிங்கிற்கு போன போது தான் அதன் சாவால் தன்மை புரிந்தது. ஆனால் இயக்குனர் ஜெயதீபன் எனக்கு தந்த வசன சுதந்திரம் என் சிரமத்தைக் குறைந்தது. ஏன் என்றால் நான் பேசிய வசனங்கள் எனக்கு காட்சி விளங்கப்படுத்திய பின்னர் எனது சொன்ன மொழியில் பேசியவையே.. ஒரு சில காட்சிகளைத் தவிர மற்றையவை அனைத்திற்கும் ஒரு சந்தர்ப்பமே எடுத்துக் கொண்டது வியப்பாகவே இருந்தது அத்தனைக்கு காரணம் அனுபவசாலியான வீடியொ தொகுப்பாளர் செல்வம் அண்ணை தான்.

இப்படத்தில் 1993 -1994 ல் சின்ன விழிகள் போன்ற ஈழப்படங்களில் நாயகனாக கலக்கிய செல்வம் அண்ணையுடன் நடித்தது வித்தியாசமான அனுபவமாகவும் இருந்தது. அத்துடன் பருத்தித்துறை ஹாட்லி கல்லூரி ஆசிரியரான பரணிதரன் சேரும் எம்மோடு இருந்தது சந்தோசமாக இருந்தது.

டப்பிங்கில் மிக அதிக கவனம் செலுத்திக் கொண்ட விடயம் என்னவென்றால் எமது பிராந்திய மொழிவழக்கைத் தான் காரணம் பல தென்னிந்திய திரைப்படங்களும் நடிகர்களும் பேச முனைந்து தோற்றுப் போன விடயங்களில் இதுவும் மிக முக்கியமான ஒன்றாகும். பாயும்புலி அனோரமா தொடக்கம் தெனாலி கமல், நந்தா லைலா, ராமேஸ்வரம் ஜீவா மணிவண்ணன் என ஒரு பெரும் பட்டாளமே அந்த வரிசையில் நிற்கிறது.
 படத்தில் கதை என்று சொல்லப் போனால் நீங்கள் அறியாத ஒன்றல்ல ஆனால் 4 நாட்களுக்குள் வடமாகாண குறும்படங்களுக்கான போட்டிக்கு அனுப்பியே ஆக வேண்டும் என்ற முனைப்பில் எடுக்கப்பட்டதால் ஒரு சில வழுக்களை நாமும் அறிந்திருந்தாலும் மீள் திருத்துவதற்கான சந்தர்ப்பம் கிடைக்காமல் போய் விட்டது.

தங்களது மனம் திறந்த முகஸ்துதியற்ற விமர்சனங்களை எதிர்பாரத்த நிற்கிறோம் ஏனென்றால் அடுத்தடுத்த படைப்புக்களில் எம்மைச் சீர்ப்படுத்த இவை தான் ஏதுவாக அமையும்

நன்றிச் செதுக்கலுடன்
ம.தி.சுதா

3:17 PM - By ம.தி.சுதா 12

இலங்கைப் பதிவரின் முதல் குறும்பட வெளியீடும் தமிழ் இணைய உலகில் வித்தியாசமான வெளியீடும்

                           

அனைத்து உறவுகளுக்கும் வணக்கம்.

சற்றே பிந்திய பதிவு தான் ஆனால் அந்தக் கணங்களின் சந்தோசம் கழியாத இவ்வேளையில் அதை பகிர்வதில் சந்தோசமே.

உண்மையில் இது ஒரு குறும்படம் என்ற வரையறைக்குள் பலரால் உள்ளடக்க முடியாமல் இருக்கலாம். ஆனால் எதோ இப்படியும் செய்து பார்க்கலாம் என்ற ஒரு எண்ணமே இத்தனைக்கும் காரணமாகும். ஏதேச்சையாக மதுரனும் நானும் ஒரு புகைப்படத்துறை சார்ந்த கடையில் சந்திக்கும் போது எடுக்கப்பட்ட திடீர் முடிவால் கடை முதலாளியான குகரூபனின் கைப்பேசியில் கையில் இருந்த ஒரு கதையை வைத்து எந்த வித முன்னாயத்தமும் இன்றி ஒரு மணித்தியாலத்தில் எடுத்த முடித்த ஒரு விளையாட்டுத்தனமான படைப்புத் தான் இந்த ராக்கெட் ராஜாவாகும்.

உண்மையில் ஒரு மணித்தியாலத்தில் எடுத்து முடிக்கப்பட்டது என்று சொல்லப்பட்டாலும் இதை எடிட் பண்ண மதுரன் செலவிட்ட நேரம் பல மணித்தியாலங்களாகும். ஏனெனில் அந்தக் கடையுடன் என் வேலை முடிந்து விட்டது. ஆனால் அதற்கான இசைக் கோர்ப்பிலிருந்து அனைத்து வேலைகளையும் அவன் தான் செய்தான்.

அதே போல படத்தை ஒளிப்பதிவு செய்த MULTI VERSION GRAPHIC குகரூபனை கைப்பேசி படாதபாடு படுத்திவிட்டது.

அத்துடன் ஜங்கிள் தனுசனும் காட்சி அமைப்பில் பெரிதும் உதவியாக இருந்தார்.

யாழ்ப்பாணத்தில் ஆரம்பிக்கப்பட்ட பல நல்ல நல்ல குறும்படங்கள் குழு ஒற்றுமையின்மையால் தடைப்பட்டுப் போனாலும் ஏதாவுது ஒன்றைச் செய்தாக வேண்டும் என்ற கட்டாயத்தாலேயே இதைச் செய்து முடித்துள்ளோம்.

வெளியீடு

இது வரை தமிழ் இணையத்தில் இடம்பெறாத ஒரு முயற்சியாக இருக்கட்டுமே என்ற எண்ணத்தில் நாற்றுக் குழுமத்தில் வெளியிடத் தீர்மானித்தோம். ஆனால் எதிர் பார்த்ததை விட நண்பர்களின் ஆதரவு மிகவும் உற்சாகத்தை அளித்தது. வேலை நாளாக இருந்தாலும் இந்த விழாவுக்காக நேரம் ஒதுக்கி அரும்பாடு பட்ட அம்பலத்தார் ஐயா, கலை விழி, ஐடியாமணி, நிருபன், காட்டான், இம்ரான், வருண், கந்தசாமி போன்றோருக்கு பல நூறு நன்றிகள் சொல்லக் கடைமைப்பட்டிருக்கிறேன்.

நிகழ்ச்சியை கலைவிழி தொகுத்து வழங்கியதுடன் அறிமுக உரையையும் வழங்கியிருந்தார்.

ஜனா அண்ணா அவர்கள் மங்கள விளக்கை ஏற்றி தமிழ்மொழி வாழ்த்தையும் வழங்கிச்சிறப்பித்திருந்தார்.

அதன் பின்னர் திரு பொன்னர் அம்பலத்தார் ஐயா அவர்கள் வரவேற்புரையை வழங்கியதுடன் குறும்படத்தையும் வெளியிட்டு வைத்தார்.

படத்தின் மேல் சொடுக்கிப் பெரிதாக்கலாம்.

அதன் பின்னரான விமர்சனத்தை வருண் வழங்கியிருந்தார்.

அதன் பின்னர் இறுதி நிகழ்வாக இம்ரான் அவர்கள் நன்றியுரையை வழங்கியதுடன் மிகவும் குறுகிய நேரத்திலேயே சிறப்பாக நிகழ்வு நிறைவுக்கு வந்தது.

அதன் பின்னர் வருகையாளர்களின் விமர்சனமும் பதியப் பெற்றது. நிகழ்வில் கலந்து கொண்டோரை உபசரிப்பதில் சிரத்தை எடுத்துக் கொண்ட சகோதரி சித்தாராவிற்கும் இந்த இடத்தில் நன்றியைத் தெரிவித்துக் கொள்கின்றேன்.

விமர்சனங்களை நான் விரும்பியது போல நேரடியகவே நிறைகளையும் குறைகளையும் தெரிவித்த துஸ்யந்தன், கந்தசாமி, மருதமூரான், ஹலிவுட் ரசிகன், ஜனா அண்ணா, நிருபன், ஐடியா மணி, காட்டாண்ணா, அமல்ராஜ், அறிவிப்பாளர் முகுந்தண்ணா, ஜீ , கிருத்திகன், முகுந்தன், சுஜா அக்கா மற்றும் எவரையேனும் தவற விடப்பட்டிருந்தாலும் அனைவருக்கும் இந்த இடத்தில் நன்றியைத் தெரிவித்துக் கொள்கின்றேன்.

அதே போல அடுத்த படமாக உள்ளூர்த் திருட்டுக்களை மையப்படுத்தி அருமையான ஒரு கதைக்களத்துடனும் விளம்பரத் துறையிலும் நாடகத்துறையிலும் தேர்ச்சி பெற்ற ஹரிகரனின் இயக்கத்தில் எடுக்கும் திட்டம் இருக்கிறது. சரியான பண வசதியும் குழுவும் அமைந்ததும் ஒரு சிறப்பான குறும்படமாக உருவாக்கவுள்ளொம். இதற்கான வேலைகள் மிக விரைவில் ஆரம்பிக்கப்படும் என்பதை மிகவும் மகிழ்ச்சியுடன் தெரிவித்துக் கொள்கின்றோம்.

நன்றிச் செதுக்கலுடன்

ம.தி.சுதா


இதோ அக்குறும்படம்

3:32 PM - By ம.தி.சுதா 25

இலங்கைப் பதிவர்களின் முதல் குறும்படம் - ஒரு பழைய முயற்சி

வணக்கம் உறவுகளே

சேமம் எப்படி?

      இன்றைய காலகட்டத்தில் பெரிய பெரிய இணையத் தளங்களுடன் போட்டி போடும் அளவுக்கு வலைத் தளங்கள் வளர்ந்துள்ளது போல பெரிய பெரிய முதலீட்டுப் படங்களுடன் போட்டி போடும் அளவுக்கு குறும்படங்கள் தமக்கென தனியிடத்தைப் பிடித்துள்ளது.

அதிகளவான படங்கள் இந்தியாவிலிருந்து வெளியானாலும் இலங்கையிலிருந்தும் பல படங்கள் வெளியாகிக் கொண்டே இருக்கிறது. யாழ்ப்பாணத்திலிருந்து சென்ற ஆண்டு மட்டும் 50 ற்கு மேற்பட்ட குறும்படங்கள் வெளியாகியிருந்தது.

அந்த வகையில் இலங்கைப் பதிவுலகத்திலிருந்தும் ஒரு குறும்படத்தை வெளியிடும் முயற்சியில் பதிவர் கூல்போய் கிருத்திகன் மிக நீண்ட காலமாக முயற்சியில் ஈடுபட்டிருந்தார். அவருக்கு சரியான துணையின்மையால் நீண்ட காலம் அது கிடப்பிலேயே இருந்தது.

இறுதியாக பதிவர் ஜனா அண்ணாவின் மகளுடைய பிறந்த நாள் விழாவில் அந்த திரைக்கதையை கூறி எடுக்கப் போகிறேன் என ஆணித்தரமாகக் கூறியவர். ஒரு நாள் இரவு போன் போட்டு “மதிசுதா நாளைக்கு துவங்கப் போகிறேன் நேரம் கிடைத்தால் ஒரு தடவை வந்திட்டுப் போங்கோ“ என்றார்.

நானும் பெரிதாக நினைக்காததால் என்பாட்டுக்கு வேலைக்கு போய் விட்டேன். திடிரேன போன் வரத்தான் கேட்டது நினைவுக்கு வர அந்த நேரம் கொட்டும் மழையாகையால் போட்டிருந்த சேட் நனைந்தாலும் என இன்னுமொரு சேட்டை பையினுள் வைத்துக் கொண்டு ஓடினேன்.

அங்கே பார்த்தால் எனக்கும் ஒரு முக்கிய வேடமாம். பிறந்து இதுவரை காலத்தில் பல மேடை நாடகம் இயக்கி நடித்திருந்தாலும் கமரா முன் போய் நின்றது என்றால் கல்யாண வீடு மற்றும் பூப்புனித நீராட்டு விழா போன்றவற்றில் மட்டுமே.

சரி நடிப்போம் என ஆரம்பித்த பிற்பாடு தான் விடயம் புரிந்தது.

முன்னோட்டத்தை கிழே இணைத்துள்ளேன்.

படத்தில் மிக முக்கியமாகக் குறிப்பிட வேண்டியவை

1. யாழ்ப்பாணம் அரசகட்டுப்பாட்டுக்கு கிழே வந்த பின்னர் படப்பிடிப்புக்கு அனுமதி கிடைக்காத அதன் மையப்பகுதியில் முக்கிய காட்சிகள் படமாக்கப்பட்டிருக்கிறது.

குறிப்பாக பஸ் நிலையத்தின் மையப்பகுதியில் தீபாவளி சனக் கூட்டத்தினுள்ளே கொட்டும் மழையில் ஐந்து ஆறு retake எடுத்து பல காட்சிகளை படமாக்கப்பட்டிருக்கிறது.

2. படம் பிடிக்கவே அனுமதி கிடைக்காத புதிய சங்கிலியன் சிலையடியினில் காட்சிகள் படமாக்கியமை. என பல விடயங்களை குறிப்பிடலாம்.

சங்கிலியனின் அரண்மனை வாசல், மந்திரிமனை, யாழ் நூலகம், கசூர்ணா கடற்கரை, நல்லூர் கந்தசுவாமி கோயில், நல்லூர் பாரதியார் சிலை, யாழ் வைத்தியசாலை முகப்பு, வேம்படி மகளீர் கல்லூரி, யாழ்ப்பாணம இந்துக் கல்லூரி என பல முக்கியமாக இடங்களில் படப்பிடிப்பை மேற்கொண்டிருந்தோம்.

மிகுதியை படத்திலேயே காணுங்கள்.
குறுப்படம் சம்பந்தமான மேலதீக தகவல்களை கீழே உள்ள தொடுக்கில் உள்ள முகநூல் பக்கத்தை லைக் பண்ணுவதன் முலாம் நீங்கள் தொடர்ச்சியாகப் பெற்றுக் கொள்ளலாம்.
CLICK HERE 

மேலதிக கொசுறு ஒன்று - இப்படத்தில் வரும் விபத்துக் காட்சி ஒன்றுக்கு மங்காத்தாவில் அஜித் பயன்படுத்தியது போன்ற மோட்டார் சைக்கிள் ஒன்று யாழ்ப்பாணத்தின் மோட்டார் சைக்கிள் ஓட்ட சாகசக்காரர் ஒருவர் மூலம் பயன்படுத்தப்பட்டிருக்கிறது.

தீபாவளித் திருநாளைக் கொண்டாடும் அனைத்து உறவுகளுக்கும் என் வாழ்த்துக்களைத் தெரிவித்துக் கொள்கிறேன்

5:08 PM - By ம.தி.சுதா 46