செல்வச்சந்நிதி ஆலயத்தின் சூரன் போர் காணொளி (ஈழத்தை பிரிந்தவர்க்காக)

        ஈழவரலாற்றில் மிகவும் தொன்மைவாய்ந்ததும் புராணச் சிறப்பு மிக்கதுமான ஒரு முக்கிய ஆலயம் தான் தொண்டமானாறு செல்வச் சந்நிதியாலயமாகும்.

              ஈழப்போரின் வடுக்களை முழுமையாகத்தாங்கி ஒரு வரலாற்றுச் சிறப்பு மிக்க ஆலயமாகவும் திகழ்கிறது.

இலங்கையின் தெற்கே இருக்கும் கதிர்காமக் கோயிலுடன் நெருங்கிய தொடர்பை பேணும் இவ்வாலயத்திலும் மந்திரங்கள் கொண்டு பூசை செய்யப்படுவதில்லை. இங்கேயும் பூசை செய்பவர்கள் வாய்கட்டியே பூசை செய்கிறார்கள்.

    வீரபாகுதேவர் சூரபத்மனிடம் தூது சென்ற போது தனது காலடியைக் கல்லோடை என்ற இடத்தில் பதித்துச் சென்றதாகவும் பின்பு திரும்பும் வேளை சந்திக்கால பூஜை செய்யவேண்டியிருந்ததால் வல்லி ஆற்றங்கரையில் பூவரச மரநிழலில் வேல்ஒன்றை வைத்து சந்திக்கால பூஜை செய்து வழிபட்டதாகக் கூறப்படுகிறது. அந்த பூவரசு இப்போதும் அங்கே இருக்கிறது.

இதன் போர்க்கால வடுக்களை நோக்குகையில் இலங்கையின் மிகப்பெரும் தேரைக் கொண்டிருந்த இந்த ஆலயத்தின் தேரை இலங்கை ராணுவத்தினர் 1986 ல் எரித்துத் தீக்கிரையாக்கியிருந்தார்கள். அந்த தேருக்கான வடம் (தேர் இழுக்கும் கயிறு) வந்த கதையே மிகவும் வியப்பானது.

வெளிநாட்டில் கப்பல் ஒன்றில் வேலை செய்த நபர் ஒருவர் இந்த தேருக்கான வடம் செய்து அனுப்ப விரும்பினார். ஆனால் அவரால் அதை அந்தளவு தூர தேசத்தில் இருந்து அனுப்ப முடியவில்ல. அதனால் வடத்தை திரித்து அதை சுருட்டிக் கடலில் போட்டாராம். அது தொண்டமான் ஆற்றங்கரைக்கு வந்த வேளை அதைக்கண்ட ஒரு மீனவன் அதை அபகரித்துச் சென்று வீட்டில் வைத்து விட்டான்.

இரவு பூசகரின் கனவில் முருகன் தோன்றி ஆளை அடையாளம் காட்டியதையடுத்து பூசகர் பரிவாரங்களுடன் சென்ற போது அவன் வீட்டில் வடம் இருந்திருக்கிறது.

      இப்படி பல புதுமைகளைக் கொண்ட அந்த ஆலயத்தின் ஆதாரங்களை படங்களுடன் பிறிதொரு பதிவில் பகிர்கின்றேன்.

குறிப்பு - இக்காணொளியை படம் பிடித்து உதவிய கோகுலனுக்கு நன்றி தெரிவிப்பதுடன் இதை யார் வேண்டுமானாலும் பயன்படுத்த அனுமதியளிக்கிறேன். (அப்புறம் ஏண்டா வோட்டர் மார்க் அடிச்சிருக்கே என்று கேட்கிறிங்களா.  அது யாருக்குமே இடைஞ்சல் இல்லாத இடத்தில் தான் இடப்பட்டிருக்கிறது. யாரும் நோகமல் நுங்கு குடிக்கக் கூடாதல்லவா)

அன்பு உறவுகளே கடந்த சில நாட்களாக பதிவிட்டாலும் நேரமின்மையாலும் கிடைக்கும் நேரத்தை யாழ் குடாநாட்டின் மின்சாரத் தடை வாடைக்கெடுப்பதாலும் எவருடைய தளத்திற்கும் வர முடியவில்லை. நாளை முயற்சிக்கிறேன் உறவுகளே..